ШИНОСОИИ РАИСИ ВИЛОЯТИ ХАТЛОН БО ҶАРАЁНИ КОРҲОИ СОХТМОНИИ ИНШООТИ ҶАШНӢ ДАР ШАҲРИ КӮЛОБ 15 сентябр. Раиси вилояти Хатлон Давлаталӣ Саид бо мақсади шиносоӣ аз рафти корҳои сохтмонӣ, ободонӣ ва созандагӣ ба шаҳри Кӯлоб сафари корӣ анҷом доданд.Зимни сафар раиси вилоят аз рафти корҳои сохтмонӣ ва ободонӣ дар як қатор иншооти ҷашнӣ боздид намуда, бо масъулон ва сохтмончиён суҳбат карданд. Таъкид гардид, ки корҳои созандагӣ ба муносибати 35-солагии Истиқлоли давлатии Ҷумҳурии Тоҷикистон бояд бо сифати баланд, мутобиқ ба талаботи муосир ва дар муҳлатҳои муайяншуда анҷом дода шаванд.Раиси вилоят Давлаталӣ Саид ба масъулон ҷиҳати истифодаи самараноки имкониятҳо, ҷалби бештари мутахассисони маҳаллӣ, риояи меъёрҳои сохтмонӣ ва назорати сифати корҳои иҷрошаванда супоришҳои мушаххас доданд. Ҳамчунин, ба масъалаҳои ободонии гирду атрофи иншоот, кабудизоркунӣ, тозагӣ ва омодасозии инфрасохтори зарурӣ таваҷҷуҳи махсус зоҳир гардид.Дар ин замина, масъулон вазифадор гардиданд, ки корҳои сохтмонӣ ва ободониро бо масъулияти баланд идома дода, иҷрои саривақтии нақшаҳои пешбинишударо таъмин намоянд.

Ифтитоҳи қисми минтақавии Раёсати Вазорати корҳои дохилӣ дар вилояти Хатлон оид ба гурӯҳи ноҳияҳои Кӯлоб 04.10.2026 Қисми минтақавии Раёсати Вазорати корҳои дохилӣ дар вилояти Хатлон оид ба гурӯҳи ноҳияҳои Кӯлоб иншооти дигари тозабунёд дар маркази шаҳри Кӯлоб мебошад, ки 4 октябр бо иштироки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ифтитоҳ гардид. Зимни шиносоӣ ба Роҳбари давлат иттилоъ дода шуд, ки дар ин бинои бисёрошёна барои кормандони 20 шуъба ва гурӯҳҳои 10 ноҳияи минтақаи Кӯлоб шароити муосири хизматӣ фароҳам оварда шудааст. Бинои қисми минтақавии Раёсати Вазорати корҳои дохилӣ дар вилояти Хатлон оид ба гурӯҳи ноҳияҳои Кӯлоб бо ҷалби коргарони маҳаллӣ ва бо истифодаи масолеҳи босифати сохтмонӣ бунёд шуда, ба муносибати 35-солагии Истиқлоли давлатӣ туҳфаи арзишманди Ҳукумати кишвар ба кормандони ин мақомот гардид. Дар ин ҷо барои мутахассисони шуъбаву гурӯҳҳо ҳуҷраҳои кории муҷаҳҳаз бо таҷҳизоти муосир, ҳуҷраи хоб ва дигар шароити зарурӣ таъмин шудааст. Қисми минтақавии Раёсати Вазорати корҳои дохилӣ дар вилояти Хатлон оид ба гурӯҳи ноҳияҳои Кӯлоб бо дастгирии Ҳукумати кишвар аз ҷониби Раёсати сохтмони Вазорати корҳои дохилӣ бо тарҳи муосир ва ҷавобгӯи талаботи меъморӣ сохта шуда, дорои маҷлисгоҳи барҳаво бо 354 курсӣ, ошхона, меҳмонхона, толори варзиш, таваққуфгоҳ ва дигар ҷойҳои зарурӣ мебошад. Пешвои миллат муҳтарам Эмомалӣ Раҳмон зимни суҳбат бо масъулону кормандони соҳа, онҳоро ба хизмати софдилона ба Ватан ҳидоят намуданд. Ба таъкиди Роҳбари давлат, дар замони ҷаҳонишавӣ бояд ҳар як корманди мақомоти ҳифзи ҳуқуқ ҳушёру зирак бошад, донишу малакаи худро сайқал диҳад, дар роҳи ҳифзи ҳуқуқу озодиҳои мардум ва таъмини тартиботи ҷамъиятӣ софдилонву содиқона хизмат намояд

Ифтитоҳи раёсати ҳифзи муҳити зист дар минтақаи Кӯлоб 04.10.2026 Дар идомаи сафари корӣ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бинои Раёсати ҳифзи муҳити зист дар минтақаи Кӯлобро мавриди истифода қарор дода, бо шароити он шинос шуданд. Иттилоъ дода шуд, ки иншоот ба истиқболи ҷашни 35-солагии Истиқлоли давлатӣ бо дастгирии Кумитаи ҳифзи муҳити зисти назди Ҳукумати Ҷумҳурии Тоҷикистон аз ҷониби пудратчии сохтмон – Ҷамъияти дорои масъулияти маҳдуди Дилафрӯз дар муҳлати қариб 5 сол бо ҷалби 45 коргари маҳаллӣ сохта шудааст. Тибқи лоиҳа дар бинои навсохт шуъбаю бахшҳои дастгоҳи марказии Раёсат, маркази рақамикунонӣ ва инноватсионии Кумитаи ҳифзи муҳити зист дар минтақаи Кӯлоб, маҷлисгоҳ бо 110 курсӣ, 25 ҳуҷраи кории муҷаҳҳаз бо таҷҳизоти муосири техникӣ, озмоишгоҳ, китобхона, меҳмонхона бо 6 ҳуҷраи хоб, ошхона ва дигар иншооти ёрирасон ҷойгир мебошанд, ки ҳамаи онҳо бо мизу курсӣ ва таҷҳизоти пешрафтаи соҳавӣ таъмин ҳастанд. Роҳбари давлат муҳтарам Эмомалӣ Раҳмон иқдоми бунёди чунин иншооти замонавиро дар маркази шаҳри Кӯлоб барои рушди соҳа муҳим арзёбӣ карда, ба масъулон дастур доданд, ки барои анҷоми босифати корҳои назоратӣ, ҳифзи муҳити зист ва татбиқи «Барномаи давлатии сабзкории Ҷумҳурии Тоҷикистон барои давраи то соли 2040» чораҳои иловагӣ андешанд. Дар бомпӯши бинои навсохти соҳаи ҳифзи муҳити зист панелҳои офтобӣ бо иқтидори 36 килловатт насб карда шудааст, ки тамоми фасли сол биноро бо неруи барқи доимӣ таъмин мекунад. То ин вақт кормандони Раёсат дар бинои солҳои 50-уми асри гузашта бунёдшуда, фаъолият мекарданд, ки шароити кории он ба талаботи замон ҷавобгӯ набуд. Бо ифтитоҳи иншооти нав корманди Раёсат, ки наздики 50 нафарро ташкил медиҳад, фаъолиятро дар бинои муосиру дорои шароити хуби корӣ идома дода, донишу малакаи худро дар рушди соҳа сарф менамоянд. Дар ин ҷо, ҳамчунин ба Роҳбари давлат барномаҳои нави самти рақамикунонии соҳа, ки дар доираи “Солҳои рушди иқтисоди рақамӣ ва инноватсия” (2025-2030) аз ҷониби Кумитаи ҳифзи муҳити зист амалӣ шудааст, муаррифӣ гардид. Иттилоъ дода шуд, ки таҳияи шакли нави барномаҳои Назорат, Экомеп, Маркази тамос, Дидбонгоҳи отмосферӣ ва Рақамикунонии замини Тоҷикистон бо зеҳни сунъӣ, сифати корҳои назоратӣ ва сатҳи хизматрасониро ба мутахассисону шаҳрвандон ба маротиб осон намудааст. Бо барномаи электронии Назорат нозир ва ё масъулини дахлдор имкон пайдо мекунанд, ки ҳангоми ошкор шудани қонуншиканиҳои экологӣ, маҳалли воқеъшавии ҳодисаро тавассути геолокатсия муайян намуда, маълумоти лозимаро дар шакли электронӣ сабт ва протоколи электронӣ таҳия намояд. Барномаи Экомеп бошад, чун пойгоҳи ягонаи маълумоти экологӣ хизмат намуда, маълумоти муҳими соҳаро дар шакли муназзам ва рақамӣ муттаҳид месозад. Ҳоло фаъолияти Маркази тамос бо рақами кӯтоҳи 2122 ба роҳ монда шуда, ки шаҳрвандон метавонанд тавассути он аз ҳолатҳои эҳтимолии вайрон гардидани талаботи қонунгузории ҳифзи муҳити зист хабар дода, муроҷиатҳои худро пешниҳод намоянд. Ин иқдом қадами муҳими самти рақамикунонии фаъолияти Кумитаи ҳифзи муҳити зист буда, барои такмили низоми идоракунии иттилооти экологӣ, баланд бардоштани шаффофият ва рушди хизматрасониҳои рақамӣ дар соҳа заминаи мусоид фароҳам меорад.

Зиёрати оромгоҳи Мир Сайид Алии Ҳамадонӣ 04.10.2026 4 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Кӯлоб нахуст бо нишони эҳтиром ва арҷгузорӣ ба гузаштагон, оромгоҳи олими тавоно ва мутаффакири барҷаста Мир Сайид Алии Ҳамадониро зиёрат намуданд. Пешвои миллат муҳтарам Эмомалӣ Раҳмон барои сулҳу оромии Ватан, осоиштагии аҳли башар, саодату зиндагии шоистаи мардуми Тоҷикистони соҳибистиқлол дуо ва фотеҳаи нек намуданд. Оромгоҳи шахсияти хирадманди миллати тоҷик Мир Сайид Алии Ҳамадонӣ ёдгории таърихӣ-бостонӣ аз асрҳои 14 ва 15-и мелодист, ки дар маркази шаҳри Кӯлоб ҷой гирифтааст. Бинои ин ёдгории таърихӣ аз санъати миллии меъморӣ, ҳунари зебоиофарии устоҳои чирадасти маҳаллӣ, ки таҷассумгари санъати баланди миллии тоҷикианд, шаҳодат медиҳад. Дар даврони соҳибистиқлолии кишвар ин макони муқаддас бо дастгириҳои Сарвари давлат дар солҳои 1995, 2006 ва 2015 таҷдиду навсозӣ гардид. Ҳамарӯза меҳмонон ва сайёҳони хориҷӣ аз ин ёдгории таърихию фарҳангӣ дидан менамоянд. Пешвои миллат муҳтарам Эмомалӣ Раҳмон барои боз ҳам ободу зебо гардонидани атрофи оромгоҳ ва риояи суннатҳои миллӣ ба масъулин дастуру супоришҳои судманд доданд.

Истиқбол дар Фурудгоҳи байналмилалии Кӯлоб 04.10.2026 4 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон пас аз сафари корӣ ба ноҳияҳои Фархор ва Восеъ, бо мақсади ифтитоҳи як қатор иншооти таъиноти гуногун, шиносоӣ бо ваъи зиндагии мардум, гузоштани санги асос ба сохтмони иншооти оянда ва иштирок дар тантанаҳои ҷашни 35-солагии Истиқлоли давлатии Ҷумҳурии Тоҷикистон ба шаҳри Кӯлоби вилояти Хатлон ташриф оварданд. Дар фурудгоҳи байналмилалии шаҳри Кӯлоб Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро раиси вилояти Хатлон ва масъулону намояндагони мақомоти иҷроияи ҳокимияти давлатии маҳаллӣ бо эҳтиром ва самимияти беандоза пешвоз гирифтанд. Ба истиқболи шоистаи Роҳбари давлат муҳтарам Эмомалӣ Раҳмон дар даромадгоҳи шаҳр фаъолону ҷавонон бо шукуҳ ва ҷалоли хоса барномаи рангини ҳунарӣ пешниҳод намуданд. Истиқболи гарму самимӣ ва шодию нишоти намояндагони сершумори аҳолии ҷомеа дар фазои сафобахши Ватан шаҳодати ифтихор ва шукргузории мардуми Тоҷикистон аз сиёсати муваффақонаи Пешвои миллат муҳтарам Эмомалӣ Раҳмон буда, суруду таронаҳои дилангез ҳамбастагиву ҳамдилӣ, иттиҳоду дӯстии мардуми кишвар ва комёбиву дастовардҳои беназири даврони соҳибистиқлолиро тараннум намуданд.

ОБОДОНИЮ СОЗАНДАГӢ ДАР ДЕҲАИ НАВОБОД Бахшида ҷашни бузурги миллӣ 35-солагии Истиқлоли давлатии Ҷумҳурии Тоҷикистон, корҳои ободонию созандагӣ дар шаҳри Кӯлоб ва деҳоти он бо вусъати тоза идома доранд. Сокинони маҳалҳо талош доранд, ки бо саҳми худ дар ободии муҳити зист ва беҳтар гардидани шароити зиндагӣ ҳисса гузоранд. Дар доираи ин иқдомҳо дар деҳаи Навободи Ҷамоати деҳоти Кӯлоб низ корҳои ободонӣ бо иштироки фаъолонаи сокинон ва соҳибкорон роҳандозӣ гардидааст. Аҳли заҳмати деҳа бо дарки масъулияти шаҳрвандӣ ва бо мақсади беҳтар намудани шароити зисту зиндагии мардум ба ободонии роҳҳои дохилии маҳаллаҳо машғуланд. Дар ин марҳила беш аз се километр роҳҳои дохилии деҳа асвалтпушт гардида барои ҳамвору роҳат гардидани онҳо техника ва қувваи дастӣ истифода мешавад. Ин иқдом пеш аз ҳама барои осон намудани рафтуомади сокинон, беҳтар гардидани ҳолати роҳҳо ва фароҳам овардани шароити мусоид барои зиндагии мардум амалӣ мегардад. Зеро ободии роҳҳои маҳаллӣ яке аз омилҳои муҳими беҳтар намудани инфрасохтори деҳот ба шумор меравад. Дар доираи ин тадбирҳо сокинони деҳа бо оби тозаи ошомиданӣ низ таъмин гардидаанд. Фароҳам гардидани дастрасии мардум ба оби тоза яке аз масъалаҳои муҳими иҷтимоӣ буда, барои беҳтар шудани шароити зиндагии аҳолӣ заминаи мусоид фароҳам меорад. Сокинони деҳаи Навобод низ ният доранд, ки ин иқдомҳоро идома дода, дар оянда барои ободонии роҳҳо, тозагии маҳал, кабудизоркунӣ ва беҳтар намудани инфрасохтори деҳа саҳми худро гузоранд.

КОРҲОИ ОБОДОНИВУ СОЗАНДАГӢ БАХШИДА БА 35-СОЛАГИИ ИСТИҚЛОЛИ ДАВЛАТӢ ДАР ҶАМОАТИ ДЕҲОТИ ЗИРАКИИ ШАҲРИ КӮЛОБ Дар маҳаллаи Ҳакимободи Ҷамоати деҳоти Зиракии шаҳри Кӯлоб бо иштироки фаъолонаи сокинони маҳалла корҳои ободониву созандагӣ вусъат гирифта истодаанд.Ин тадбирҳо ба муносибати 35-солагии Истиқлоли давлатии Ҷумҳурии Тоҷикистон ва дар доираи эълон гардидани соли 2026 ҳамчун «Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ» амалӣ карда мешаванд.Сокинони маҳалла бо ҳисси баланди масъулияти шаҳрвандӣ дар корҳои ободонӣ фаъолона иштирок намуда, барои беҳтар намудани муҳити зист, ободии маҳалла ва боз ҳам зебову назаррабо гардидани маҳалли зисти худ саҳми арзанда мегузоранд.

ҚАБУЛИ ШАҲРВАНДОН ДАР МАҚОМОТИ ИҶРОИЯИ ҲОКИМИЯТИ ДАВЛАТИИ ШАҲРИ КӮЛОБ Ҷиҳати иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, вобаста ба баррасӣ ва ҳалли муроҷиатҳои хаттӣ ва шифоҳии шаҳрвандон ва татбиқи Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ», 19 сентябри соли 2026 дар мақомоти иҷроияи ҳокимияти давлатии шаҳри Кӯлоб қабули шаҳрвандон аз ҷониби Раиси шаҳри Кӯлоб, муҳтарам Пирзода Диловар, баргузор гардид.Зимни қабул муроҷиатҳои шаҳрвандон вобаста ба масъалаҳои гуногун шунида шуда, барои баррасии ҳамаҷониба ва ҳалли саривақтии онҳо ба масъулини дахлдор дастуру супоришҳои мушаххас дода шуд.