Кормандони Институти омӯзиши пиряхҳо ва криосфераи АМИТ бо сипоснома қадрдонӣ гардиданд

Дар доираи ташаббусҳои байналмилалии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти обу иқлим, ҳифзи муҳити зист ва ҳифзи пиряхҳо Маҷлиси намояндагони Маҷлиси Олии Ҷумҳурии Тоҷикистон дар ҳамкорӣ бо Кумитаи ҳифзи муҳити зисти назди Ҳукумати Ҷумҳурии Тоҷикистон озмуни ҷумҳуриявиро таҳти унвони «Ҳифзи пиряхҳо – омили муҳимми таъмини ояндаи дурахшони инсоният» баргузор намуд.

Озмун бо мақсади тарғибу ташвиқи аҳамияти пиряхҳо ҳамчун манбаи асосии захираҳои оби, баланд бардоштани маърифати экологӣ ва дастгирии ташаббусҳои Тоҷикистон дар самти ҳифзи захираҳои обӣ ва пиряхҳо баргузор гардид.

Дар маросими ҷамъбасти озмун, ки имрӯз баргузор шуд, Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода иштирок намуда, ба иштирокчиён ва ғолибони озмун барои фаъолияти эҷодӣ ва саҳми онҳо дар ин самт барору комёбиҳои бештар орзу намуд.

Дар номинатсияи «Беҳтарин мақола» кормандони Муассисаи давлатии «Институти омӯзиши пиряхҳо ва криосфера»-и Академияи миллии илмҳои Тоҷикистон барои саҳми арзанда дар тарғибу ташвиқи ташаббусҳои байналмилалии Тоҷикистон дар самти обу иқлим ва ҳифзи пиряхҳо, инчунин иштироки фаъолона дар озмуни ҷумҳуриявии «Ҳифзи пиряхҳо – омили муҳимми таъмини ояндаи дурахшони инсоният» бо сипосномаҳо сарфароз гардиданд.