Хабари фоҷиабори ҳалокати фарзанди барӯманди халқи тоҷик, ватандӯсти асил, муовини Раиси Маҷлиси миллии Маҷлиси Олии Ҷумҳурии Тоҷикистон, раиси Вилояти Мухтори Кӯҳистони Бадахшон Мирзонабот Алишер Худобердӣ, инчунин аъзои оила ва ҳамкорони ӯ дар натиҷаи садамаи нақлиётӣ боиси андӯҳи амиқ ва таъсири ҷиддӣ дар қалби мо гардид. Ин талафоти сангин ва ҷуброннопазир барои давлату миллати Тоҷикистон, пайвандону наздикон, дӯстон ва ҳамкорони марҳум мебошад.
Ба пайвандону наздикони марҳум, инчунин ба роҳбарият ва кормандони Мақомоти иҷроияи ҳокимияти давлатии Вилояти Мухтори Кӯҳистони Бадахшон ҳамдардии амиқ ва тасаллияти самимии худро баён менамоям.
Марҳум тамоми фаъолияти худро ба хизмати содиқона ба Ватан, таҳкими давлатдорӣ ва ҳифзи манфиатҳои миллии Ҷумҳурии Тоҷикистон бахшидааст. Ӯ ҳамчун роҳбари соҳибтаҷриба, дорои тафаккури таҳлилӣ, масъулияти баланд ва мавқеи устувори касбӣ дар такмили фаъолияти мақомоти давлатӣ, таҳкими суботу амният ва рушди иҷтимоиву иқтисодии Вилояти Мухтори Кӯҳистони Бадахшон саҳми арзишманд гузоштааст.
Марҳум бо маҳорати баланди касбӣ, сифатҳои волои роҳбарӣ, масъулиятшиносӣ ва принсипнокӣ миёни ҳамкорону ҷомеа эҳтироми хоса дошт. Дар ҳар гуна вазъият ӯ намунаи роҳбари касбӣ ва инсони содиқ ба вазифа ва Ватан буд.
Хотираи неки ин фарзанди содиқу фидоии Тоҷикистон ҳамеша дар қалби пайвандону наздикон, дӯстону ҳамкорон ва ҳамаи онҳое, ки ӯро мешинохтанд, эҳтиром мекарданд ва қадр менамуданд, ҷовидона боқӣ хоҳад монд.
