13.02.26 Имрӯз дар шаҳри Маскав ҷаласаи панҷуми раисони кумитаҳои парлумонии кишварҳои узви Созмони Аҳдномаи амнияти дастаҷамъӣ оид ба муносибатҳои байналмилалӣ, мудофиа ва амният баргузор гардид.
Дар ҷаласа ҳайати парлумонии Ҷумҳурии Тоҷикистонро раиси Кумитаи Маҷлиси намояндагон оид ба корҳои байналмилалӣ, иттиҳодияҳои ҷамъиятӣ ва иттилоот Гулзода Маҳмадшоҳ ва раиси Кумитаи Маҷлиси намояндагон оид ба тартиботи ҳуқуқӣ, мудофиа ва амният Маҳмудзода Насрулло намояндагӣ намуданд.
Дар ҷаласа масъалаҳои вобаста ба вазъи низомӣ-сиёсии кишварҳои узви Созмон баррасӣ гардида, инчунин афзалиятҳои раёсати Федератсияи Русия дар доираи Созмон барои соли 2026 муҳокима шуданд. Таваҷҷуҳи махсус ба тақвияти идомаи муколама бо созмонҳои байналмилалӣ ва кишварҳои сеюм ҷиҳати ҳифзи сулҳу субот, ҳамчунин ба масъалаҳои ҳамгироии мавқеъҳо оид ба амнияти байналмилалӣ ва минтақавӣ ва таъмини ҳифзи равандҳои интихоботӣ аз дахолати беруна равона гардид.
Дар рафти муҳокима аҳаммияти истифодаи имкониятҳои дипломатияи парлумонӣ ҳамчун абзори мусоидат ба ҳифзи манфиатҳои муштарак дар арсаи байналмилалӣ ва муқовимат ба таҳдидҳои эҳтимолӣ ба суботи минтақавӣ таъкид карда шуд.
Дар фарҷоми вохӯрӣ иштирокчиёни ҷаласа бо вазири корҳои хориҷии Федератсияи Русия Сергей Лавров мулоқот анҷом доданд.
