Муҳтарам Вакилони мардумӣ ва кормандони Дастгоҳи Маҷлиси намояндагон!
Пас аз чанде соли 2025 ба мо хайрбод гуфта ба ҳукми таърих ворид мешавад ва соли нави мелодии 2026, ки фарорасиашро бесаброна интизор будем, қадами мубораку ҳуҷастаи худро ба ҳаёти ҳар яки мо гузошта, моро сӯи бунёдкориву созандагиҳо ҳидоят мекунад. Дар ин лаҳзаҳои фараҳбахш, лаҳзаҳои хайрбод ба соли куҳан ҳар яки мо китоби зиндагиамонро дар соли рафта варақгардон намуда, бурду бохти худро таҳлил ва барои соли нав нақшаву ниятҳои некро тарҳрезӣ мекунем. Тавре, ки Пешвои миллат-Президенти Ҷумҳурии Тоҷикистон муҳтарам Эмомалӣ Раҳмон зикр намуданд, соли 2025 барои мардуми шарифи Тоҷикистон ва давлати соҳибистиқлоли тоҷикон бо дастовардҳои назаррас ва рӯйдодҳои муҳим боз як соли таърихӣ гардид.
Моҳи марти соли 2025 интихоботи вакилони Маҷлиси намояндагон, маҷлисҳои маҳаллии вакилони халқ ва аъзои Маҷлиси миллии Маҷлиси Олии Ҷумҳурии Тоҷикистон, яъне чорабиниҳои муҳимми сиёсӣ дар фазои озод, шаффоф ва дар сатҳи баланд баргузор гардиданд. Дигар рӯйдоди таърихӣ ҳалли пурраи масъалаҳои сарҳадии тайи беш аз сад соли охир ҳалношудаи байни ду давлат – Ҷумҳурии Тоҷикистон ва Ҷумҳурии Қирғизистон бо имзои шартнома дар бораи муайян кардани хатти сарҳади давлатӣ мебошад. Ҳамчунин, шартнома миёни Ҷумҳурии Тоҷикистон, Ҷумҳурии Қирғизистон ва Ҷумҳурии Ӯзбекистон дар бораи нуқтаи пайвастшавии сарҳади давлатии се кишвар ва Эъломияи Хуҷанд доир ба дӯстии абадӣ аз ҷониби сарони давлатҳо ба имзо расид, ки барои рушди минтақа ва идомаи ҳамкориҳои судманд заминаи мустаҳками ҳуқуқиро фароҳам месозанд.
Воқеан ҳам соли сипаришавандаи 2025 чун соли марҳилаи созандагиву бунёдкориҳо ва пур аз нақшаҳои назаррас дар китоби рӯзгори ҳар кадоми мо мақоми арзандаро соҳиб мегардад. Зеро он дар ҳаёти мардуми тоҷик дигаргуниҳои куллӣ ва пешравиҳои назаррасро ба бор оварда, соли иқдомҳои нав ба нави роҳбари давлатамон, Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон дар роҳи пойдории сулҳу субот, оромиву осудагии ҷомеа, пешгирии хавфу офатҳои табиӣ ва обу иқлим гардид.
Инчунин, соли 2025 Ҷумҳурии Тоҷикистон дар доираи ташаббусҳои ҷаҳонии худ ҷиҳати амалисозии қатъномаи Созмони Милали Муттаҳид оид ба «Соли байналмилалии ҳифзи пиряхҳо» нахустин Конфронси байналмилалии сатҳи баланд оид ба ҳифзи пиряхҳоро мизбонӣ намуд.
Рӯзи 12-уми декабри соли ҷорӣ бо ташаббуси Тоҷикистон дар ҷаласаи 7-уми Маҷмаи Умумии Созмони Милали Муттаҳид оид ба муҳити зист қатънома доир ба «Ҳифзи пиряхҳо ва криосфера, бахусус, дар минтақаҳои кӯҳӣ» қабул карда шуд.
Бо ташаббуси дигари кишвари мо қатъномаи махсуси Маҷмаи Умумии Созмони Милали Муттаҳид зери унвони «Нақши зеҳни сунъӣ дар фароҳам овардани имконоти навин барои рушди устувор дар Осиёи Марказӣ» қабул гардид.
Илова бар ин, ба Феҳристи мероси ҷаҳонии ЮНЕСКО ворид гардидани ёдгориҳои мероси фарҳангии Хуттали қадим зимни иҷлосияи 47-уми Кумитаи мероси ҷаҳонӣ дар шаҳри Париж баёнгари эътирофи ташаббусҳои Тоҷикистон мебошад.
Боиси ифтихор аст, ки ки 12-уми декабри соли ҷорӣ бо иқдоми Тоҷикистон қатъномаи Маҷмаи Умумии Созмони Милали Муттаҳид дар хусуси эълон кардани соли 2027 ҳамчун «Соли байналмилалии маърифати ҳуқуқӣ» қабул гардид».
Соли 2025 мардуми сарбаланди тоҷик баҳри амалӣ намудани ҳадафҳои стратегии кишвар қадамҳои устувор гузошт. Таҷлили бошукӯҳи наврӯзи аҷам, 28-солагии Ваҳдати миллӣ, 34-солагии соҳибистиқлолии ватан, 31 - солагии Конститутсияи кишвар ва садҳо чорабиниҳои таърихиву фарҳангии дигар, ки ба сокинони ватан ғизову лаззати маънавӣ бахшиданд, рӯйдодҳои хотирмони соли рафта мебошанд.
Ҳамдиёрони гиромӣ! Соли 2026 оғози давраи нави созандагӣ ва бунёдкорӣ дар мамлакат хоҳад буд. Бо як ҷаҳон орзуву умедҳои нек ва самимияти комил, бори дигар ҳамаи Шуморо ба оғози соли нави 2026 самимона муборакбод намуда, бахти сафеду ғайрати ободкориву нангу номуси баланди ватандориро бароятон таманно менамоям.
Сарбаланду саодатманд бошед.
Соли наватон муборак!
