Вакили маҷлиси намояндагони Маҷлиси Олии Ҷумҳурии Тоҷикистон, узви Кумита оид ба масъалаҳои аграрӣ, захираҳои об ва замин Аҳмадзода Бахтиёр дар вохӯрии сеюми Раисони парламентҳои давлатҳои Осиёи Марказӣ ва Ҷумҳурии Корея, ки рӯзҳои 15-17 декабр дар шаҳри Тошканди Ҷумҳурии Ӯзбекистон баргузор гардид, дар мавзуи «Рушди устувор ва ҳифзи муҳити зист: нақши парлумонҳо дар таъмини татбиқи ташаббусҳои экологӣ» баромад намуд.
Аҳмадзода Бахтиёр зикр намуд, ки муколамаи имрӯзаи мо ба таҳкими ҳамкорӣ, табодули таҷриба ва ҷустуҷӯи равишҳои муштарак ҷиҳати ҳалли мушкилаҳои экологӣ, ки тамоми кишварҳои минтақа бо онҳо рӯ ба рӯ ҳастанд, мусоидат мекунад.
Бояд зикр намуд, ки рушди устувор имрӯз яке аз вазифаҳои калидии ҷаҳонӣ барои давлатҳои Осиёи Марказӣ ба шумор меравад, зеро хавфҳои экологӣ дар ин минтақа бо рушди иқтисодӣ ва истифодаи захираҳои табиӣ зич алоқаманданд.
Парлумони Ҷумҳурии Тоҷикистон ба такмили асосҳои ҳуқуқии рушди устувор тавассути қабули қонунҳо, тасдиқи барномаҳои стратегӣ ва назорат аз болои иҷрои онҳо диққати махсус медиҳад. Таҷрибаи Ҷумҳурии Тоҷикистон нишон медиҳад, ки рушди устувор танҳо дар сурати кори бо низом— аз қабули қонунҳо то татбиқи амалии барномаҳои экологӣ ва ҳамкории фаъоли байналмилалӣ имконпазир аст. Дар ин замина байни кишварҳои мо як қатор созишномаҳои байнидавлатӣ оид ба ҳамкорӣ ба имзо расидаанд ва мо бояд аз ин заминаи ҳуқуқӣ самаранок истифода барем.
Итминон дорам, ки талошҳои муштараки парлумонҳои мо ва иштироки фаъол метавонанд омили қавии таҳкими амнияти экологии минтақа гарданд.
