Имрӯз таҳти раёсати муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ мизи мудаввар дар мавзуи “Тавсияҳои хотимавии Кумитаи СММ оид ба бартараф намудани ҳама гуна ҳуқуқпоймолкунӣ нисбати занон: Тоҷикистон (CEDAW/C/TJK/CO/ 3 феврали соли 2007): дастовард ва дурнамо” баргузор гардид. Мизи мудаввар тибқи нақшаи фаъолияти «Иттиҳоди занони Маҷлиси намояндагони Маҷлиси Олии Ҷумҳурии Тоҷикистон» доир шуда, дар кори он дар баробари вакилбонувони Маҷдиси намояндагону масъулини Дастгоҳи Маҷлиси намояндагон, яъне аъзои гурӯҳи Иттиҳоди занони Маҷлиси намояндагони Маҷлиси Олии Ҷумҳурии Тоикистон, ҳамзамон намояндагони воломақоми Маҷлиси миллии Маҷлиси Олӣ, Судии Олии Ҷумҳурии Тоҷикистон, Кумитаи кор бо занон ва оилаи назди Ҳукумати Ҷумҳурии Тоҷикистон, созмони бонуфузи байналмилалиии Созмони амният ва ҳамкорӣ дар Аврупо (САҲА) дар Душанбе ва васоити ахбори умум ширкат варзиданд.
Мавсума Муинӣ зимни суханронии худ иброз намуд, ки зӯроварӣ нисбат ба занону духтарон, зуҳуроти дар ҷаҳон аз ҳама зиёд паҳншуда мебошад, ки оқибатҳои нохуш ва фоҷиабор дорад. Ҷомеаи байналмилалӣ солиёни зиёд ба масъалаи зӯроварӣ нисбат ба занону духарон дахолат намекард, чунки чунин меҳисобид, ки ин масъала хусусияти хусусӣ дошта, конвенсияҳои байналмилалӣ ба он таъсир намерасонад. Аммо бо дарназардошти зиёд шудани шумораи низоъҳои миллӣ ва умуман, афзоиши зӯроварӣ дар ҷомеа на танҳо нисбати занону духтарони алоҳида, балки кулли гурӯҳҳои иҷтимоӣ пайваста таъсир мерасонд.
Ҳарчанд вайрон кардани ҳуқуқҳои занон дар мамлакатҳои ҷаҳон ба тарзҳои гуногун ба амал меомад, ҳамаи ҷабрдидагони чунин ҳуқуқвайронкуниҳо як омили умумии дучори зӯроварӣ шуданро доштанд, яъне онҳо занону духтарон буданд.
Маҳз бо ҳамин сабаб Ассамблеяи Генералии СММ 20 декабри соли 1993 Эъломия дар бораи решакан кардани зӯроварӣ нисбат ба занонро қабул намуд.
Дар Тоҷикистон шуруъ аз солҳои истиқлолии кишвар ҳимояи ҳуқуқи занону кӯдакон ва оилаҳо, инчунин дастгирии ҳуқуқии онҳо яке аз масоили муҳими давлату ҳукумат гардида, барои рафъи он қонуну фармон ва барномаҳои давлатӣ таҳия ва роҳандозӣ гардидаанд.
Дар баробари ин, Ҷумҳурии Тоҷикистон ҳамчун узви комилҳуқуқи ҷомеаи ҷаҳонӣ як қатор санадҳои меъёрии ҳуқуқии байналмилалӣ, аз ҷумла Эъломияи ҳуқуқи башар ва Конвенсия оид ба пешгирии ҳамагуна шаклҳои табъиз нисбати занонро эътироф намудааст, ки иҷрои онҳо барои беҳдошти вазъи занон дар ҷомеа равона шудааст.
Ҳамзамон моҳи майи соли 2014 Ҳукумати ҷумҳурӣ «Протоколи факултативии Конвенсия дар бораи барҳам додани тамоми шаклҳои табъиз нисбати занон»-ро тасдиқ намуд.
Воқеан давлату Ҳукумати Ҷумҳурии Тоҷикистон таҳти Сарварии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади ҳифзи ҳуқуқҳои конститутсионии занон, фароҳам овардани шароити муносиби кориву зиндагӣ барои онҳо, таҳкими мақому манзалати занон дар ҷомеа ва ҳалли масъалаҳои муҳимтарини ҳаёташон як силсила асноди меъёрии ҳуқуқиро қабул ва мавриди иҷро қарор додааст.
Имрӯз занони тоҷик дар ҳамаи шохаҳои ҳокимияти давлатӣ, мақомоти олии қонунгузор, ҳокимияти судӣ ва иҷроия, иттиҳодияҳои ҷамъиятӣ фаъолият намуда, дар пешрафти соҳаҳои гуногуни ҳаёти ҷомеа ҳисаи худро мегузоранд.
Дар назди иштирокчиёни мизи мудаввар Каримзода Мунира Бобохон - узви Маҷлиси миллии Маҷлиси Олии Ҷумҳурии Тоҷикистон, Раиси Кумитаи Маҷлиси миллии Маҷлиси Олии Ҷумҳурии Тоҷикистон оид ба масъалаҳои иҷтимоӣ, ҳифзи сиҳатӣ, илм, маориф, фарҳанг ва сиёсати ҷавонону занон, Одиназода Чаманоро - муовини Раиси Кумитаи кор бо занон ва оилаи назди Ҳукумати Ҷумҳурии Тоҷикистон, Доминик Дреснар - иҷрокунандаи вазифаи Роҳбари Дафтари барномаҳои САҲА дар Душанбе, Саидзода Марзия Файзалӣ - Раиси Шӯрои занон - судяҳои Суди Олии Ҷумҳурии Тоҷикистон, вакилони Маҷлиси намояндагони Маҷлиси Олии Ҷумҳурии Тоҷикистон ва меҳмонон баромад намуда, бо мубодилаи афкору таҷриба баргузории чорабиниро дар эҷоди муҳити мусоид барои суръат бахшидан ба татбиқи ҳадафҳои рушди устувор оид ба беҳтар намудани баробарии гендерӣ, тавонмандсозии занон ва таҳкими ҳамкорӣ бо шарикони рушд ва ҳамкор ҳамчун пул арзёбӣ намуданд.
