БАРРАСИИ МАСЪАЛАҲОИ МУҲИМИ ИҶТИМОӢ ДАР ДОИРАИ УСУЛИ “МАКТАБ БА МАКТАБ”

14-уми апрел, дар шаҳри Левакант вохӯрии судманд дар доираи усули “Мактаб ба мактаб” баргузор гардид. Дар ин чорабинӣ гурӯҳи корӣ бо иштироки раиси Ташкилоти собиқадорони ҷангу меҳнати шаҳри Левакант Ҳикматулло Султонов, раиси Ташкилоти “Сипарони Ватан” Сафар Бароталиев, сармуҳаррири рӯзномаи шаҳрии “Нури Сарбанд” Орзу Ашуров ва директори муассисаи таҳсилоти миёнаи умумии рақами 4, Сафар Қурбоназаров иштирок намуданд.

Вохӯрӣ бо сокинони деҳаи Баҳодурони ҷамоати деҳоти “Гулистон” дар бинои МТМУ №4 баргузор гардида, зимни он як қатор масъалаҳои муҳими рӯз мавриди баррасӣ қарор гирифтанд.

Аз ҷумла, иштирокчиён ба таҳкими ҳамкории волидайн бо муассисаҳои таълимӣ таваҷҷуҳи махсус зоҳир намуда, таъкид карданд, ки танҳо бо ҳамкории зич миёни оила ва мактаб метавон ба тарбияи дурусти фарзандон ноил гардид. Ҳамзамон, масъалаҳои марбут ба баланд бардоштани сатҳи маърифати ҳуқуқии ҷавонон ва пешгирии шомилшавии онҳо ба равандҳои номатлуб, аз қабили терроризм ва экстремизм, мавриди муҳокима қарор дода шуданд.

Дар рафти мулоқот инчунин оид ба пешгирии хурофотпарастӣ, бегонапарастӣ, ҷинояткорӣ ва дигар рафторҳои номатлуб миёни наврасону ҷавонон сухан рафта, сокинон ба ҳушёриву зиракӣ ва масъулияти баланд даъват карда шуданд.

Гурӯҳи корӣ ҳамзамон ҷалби бештари аҳолиро ба корҳои ободонию созандагӣ яке аз омилҳои муҳими рушди ҷомеа арзёбӣ намуда, аз сокинон даъват ба амал оварданд, ки дар пешрафти маҳал ва ободонии диёр саҳми фаъол гузоранд.

Дар фарҷоми вохӯрӣ сокинон андешаҳои худро иброз намуда, ба саволҳои худ посухҳои мушаххас гирифтанд. Чунин чорабиниҳо барои таҳкими робитаи ҷомеа бо ниҳодҳои иҷтимоӣ ва баланд бардоштани маърифати шаҳрвандон мусоидат менамоянд.