5 October 2026
Дар ҳошияи Конфронси байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018–2028» вохӯриҳои дуҷонибаи масъулини Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон бо ҳайатҳои расмии кишварҳои хориҷӣ баргузор гардиданд.
Аз ҷумла, 27 майи соли 2026 дар толори вохӯриҳои маҷмааи «Кохи Сомон» мулоқоти сардори Маркази идоракунии ҳолатҳои бӯҳронии Кумита генерал-майор Ҷамшед Камолзода бо Президенти Институти идоракунӣ ва паст кардани хавфи офатҳои табиии Ҷумҳурии Мозамбик хонум Луиза Селма Мек баргузор гардид.
Зимни вохӯрӣ ҷонибҳо масъалаҳои вобаста ба паст кардани хавфи офатҳои табиӣ, роҳҳои пешгирӣ ва вокуниш ба ҳолатҳои фавқулоддаро баррасӣ намуда, оид ба таҷрибаи кишварҳо дар ин самт мубодилаи афкор анҷом доданд.
Ҳамзамон, ҳайати Ҷумҳурии Мозамбик аз гӯшаи намоишии Кумита дар толори «Кохи Сомон» дидан намуда, ба дастовардҳои Тоҷикистон дар самти татбиқи ташаббуси «Огоҳсозии бармаҳал барои ҳама» таваҷҷуҳи хоса зоҳир карданд. Ба меҳмонон фаъолияти Низоми огоҳсозии бармаҳал ва мониторинги кӯли Сарез муаррифӣ гардид.
Дар ҷараёни мулоқот хонум Луиза Селма Мек омодагии ҷониби Мозамбикро ҷиҳати густариши ҳамкориҳои минбаъда дар самти пешгирӣ ва бартарафсозии оқибатҳои ҳолатҳои фавқулодда иброз намуд.
Дар вохӯрӣ инчунин сардори Раёсати масъалаҳои кӯли Сарез полковник Аюбзода Эроншо Гулаёз ва муовини сардори раёсати мазкур Лоиқ Холиқназар иштирок намуданд.
