Дар доираи сафари давлатии Президенти Муғулистон Ухнаагийн Хурэлсун ба Ҷумҳурии Тоҷикистон, байни Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ва Агентии давлатӣ оид ба ҳолатҳои фавқулоддаи Муғулистон Ёддошти тафоҳум ба имзо расид.
Мулоқотҳои судманди дуҷониба миёни роҳбарони ду сохтор ташкил ва баргузор гардиданд. Қобили зикр аст, ки ин мулоқотҳо дар асоси ҳамкориҳои судманд ва бо ҳадафи таҳкими муносибатҳои дӯстона сурат гирифтанд.
Ҷониби Кумитаи ҳолатҳои фавқулодда ва мудофиаи гражданӣ меҳмони соҳаиро бо эҳтироми хосса ва дар сатҳи зарурӣ пазируфт — нишоне аз дӯстиву бародарӣ миёни ду кишвар ва анъанаҳои меҳмоннавозии тоҷикӣ.
Дар идомаи сафар, ҳайати меҳмонони Агентии давлатӣ оид ба ҳолатҳои фавқулоддаи Муғулистон аз Маркази идоракунии бӯҳронии Кумитаи ҳолатҳои фавқулодда ва мудофиаи гражданӣ боздид намуданд.
Маркази мазкур бо тамоми шароитҳои хизмативу маишӣ таъмин буда, дар мувофиқа бо талаботи сатҳи байналмилалӣ фаъолият мекунад. Ин ягона маркази махсусгардонидашудаи кишвар дар самти идоракунии ҳолатҳои фавқулодда ва омӯзиши вазъиятҳои бӯҳронӣ ба шумор меравад.
Дар фарҷоми сафари расмӣ, байни ҷонибҳо тӯҳфаҳои хотиравӣ тақдим карда шуданд — ҳамчун нишонаи эҳтироми мутақобила ва арҷгузорӣ ба касбият.
