ДАВРИ ФИНАЛИИ МУСОБИҚАИ ҶОМИ РАИСИ ШАҲРИ КӮЛОБ ОИД БА ФУТБОЛИ ХУРД Нақши Пешвои муаззами миллат, Асосгузори сулҳу Ваҳдати миллӣ Президент Ҷумҳурии Тоҷикистон муҳтарам Эмомалӣ Раҳмон футболро ҳамчун василаи пешбурди тарзи ҳаёти солим ва муаррифии кишвар дар арсаи байналмилалӣ дастгирӣ мекунад. Дар сатҳи ҷумҳурӣ, аз ҷумла дар шаҳри Душанбе ва дигар минтақаҳо, мунтазам иншооти нави замонавии варзишӣ, майдончаҳо ва маҷмааҳои футболӣ бунёд карда мешаванд, ки ба стандартҳои байналмилалӣ ҷавобгӯ мебошанд. Футбол ҳамчун як падидаи ҷаҳонӣ миллионҳо одамонро муттаҳид мекунад ва ба ҳамгироии иҷтимоӣ, сулҳ ва рушди устувор мусоидат менамояд. Дар соли 2024 Ассамблеяи Генералии СММ 25-уми майро Рӯзи ҷаҳонии футбол эълон карда, аввалин шуда садсолагии мусобиқаи байналмилалии футболро, ки дар доираи Бозиҳои олимпии соли 1924 дар Париж баргузор шуда буд, ҷашн гирифт. Ин ташаббус нақши футболро дар расидан ба Ҳадафҳои Рушди Устувор (ҲРУ), аз қабили таҳкими саломатӣ, баробарӣ ва шарикӣ таъкид мекунад. Дар Тоҷикистон футбол ҷойгоҳи худро дорад ва муҳтарам Рустами Эмомалӣ раиси шаҳри Душанбе, раиси Маҷлиси Миллии Маҷлиси Олии Ҷумҳурии Тоҷикистон, президенти Федератсияи футболи Тоҷикистон, президенти Ассотсиатсияи футболи Осиёи марказӣ дар рушди он нақши беназир дорад. Футболи хурд (мини-футбол) яке аз намудҳои оммавӣ ва дӯстдоштаи варзиш дар Тоҷикистон ба шумор меравад. Он дар сатҳи маҳаллаҳо, донишгоҳҳо, идораҳои давлатӣ ва хусусӣ бо мақсади таблиғи тарзи ҳаёти солим фаъолона рушд карда истодааст. Рушди футболи хурд ва оммавӣ қисми муҳими "Барномаи рушди футбол дар Ҷумҳурии Тоҷикистон" мебошад. Ин барномаҳо ба он нигаронида шудаанд, ки шавқу шӯри кӯдакон ва калонсолон ба варзиш дастгирӣ ёфта, шароити мусоид барои бозиҳои дастаҷамъӣ фароҳам оварда шавад. Мусобиқаи кушоди шаҳри Кӯлоб оид ба футболи хурд байни кормандони мақомоти ҳифзи ҳуқуқ, ташкилоту корхонаҳо ва муассисаҳои олии касбии шаҳр барои дарёфти ҷоми Раиси шаҳри Кӯлоб бахшида ба таҷлили “Рӯзи Ваҳдати миллӣ” бо иштироку суханронии раиси шаҳр муҳтарам Пирзода Диловар ифтитоҳ гардид. Даври ниҳоии финали мусобиқа барои ҷойҳои якуму дуюм байни дастаҳои Мақомоти иҷроияи ҳокимияти давлати шаҳри Кӯлоб бо дастаи Собиқадорони тими Равшани Кӯлоб шуда гузашт, ки барандаи ҷои якум барои гирифтани Ҷоми риси шаҳр ва медалҳои тиллою сипоснома дастаи футболбозони Мақомоти иҷрояи ҳокимияти давлатии шаҳри Кӯлоб баъди бурдани бозӣ ноил гаштанд. Ҳамчунин дастаи собиқадорони тими Равшани Кӯлоб соҳиби ҷои дуюм бо сазовор шудан ба медалҳои нуқраю сипосномаҳо ва ҷои сеюм бошад насиби дастаи Донишгоҳи инноватсия ва технологияҳои рақамии Тоҷикистон шуд, сазовори медалҳои биринҷӣ ва сипосномаҳо гардиданд.

Ифтитоҳи раёсати ҳифзи муҳити зист дар минтақаи Кӯлоб 04.10.2026 Дар идомаи сафари корӣ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бинои Раёсати ҳифзи муҳити зист дар минтақаи Кӯлобро мавриди истифода қарор дода, бо шароити он шинос шуданд. Иттилоъ дода шуд, ки иншоот ба истиқболи ҷашни 35-солагии Истиқлоли давлатӣ бо дастгирии Кумитаи ҳифзи муҳити зисти назди Ҳукумати Ҷумҳурии Тоҷикистон аз ҷониби пудратчии сохтмон – Ҷамъияти дорои масъулияти маҳдуди Дилафрӯз дар муҳлати қариб 5 сол бо ҷалби 45 коргари маҳаллӣ сохта шудааст. Тибқи лоиҳа дар бинои навсохт шуъбаю бахшҳои дастгоҳи марказии Раёсат, маркази рақамикунонӣ ва инноватсионии Кумитаи ҳифзи муҳити зист дар минтақаи Кӯлоб, маҷлисгоҳ бо 110 курсӣ, 25 ҳуҷраи кории муҷаҳҳаз бо таҷҳизоти муосири техникӣ, озмоишгоҳ, китобхона, меҳмонхона бо 6 ҳуҷраи хоб, ошхона ва дигар иншооти ёрирасон ҷойгир мебошанд, ки ҳамаи онҳо бо мизу курсӣ ва таҷҳизоти пешрафтаи соҳавӣ таъмин ҳастанд. Роҳбари давлат муҳтарам Эмомалӣ Раҳмон иқдоми бунёди чунин иншооти замонавиро дар маркази шаҳри Кӯлоб барои рушди соҳа муҳим арзёбӣ карда, ба масъулон дастур доданд, ки барои анҷоми босифати корҳои назоратӣ, ҳифзи муҳити зист ва татбиқи «Барномаи давлатии сабзкории Ҷумҳурии Тоҷикистон барои давраи то соли 2040» чораҳои иловагӣ андешанд. Дар бомпӯши бинои навсохти соҳаи ҳифзи муҳити зист панелҳои офтобӣ бо иқтидори 36 килловатт насб карда шудааст, ки тамоми фасли сол биноро бо неруи барқи доимӣ таъмин мекунад. То ин вақт кормандони Раёсат дар бинои солҳои 50-уми асри гузашта бунёдшуда, фаъолият мекарданд, ки шароити кории он ба талаботи замон ҷавобгӯ набуд. Бо ифтитоҳи иншооти нав корманди Раёсат, ки наздики 50 нафарро ташкил медиҳад, фаъолиятро дар бинои муосиру дорои шароити хуби корӣ идома дода, донишу малакаи худро дар рушди соҳа сарф менамоянд. Дар ин ҷо, ҳамчунин ба Роҳбари давлат барномаҳои нави самти рақамикунонии соҳа, ки дар доираи “Солҳои рушди иқтисоди рақамӣ ва инноватсия” (2025-2030) аз ҷониби Кумитаи ҳифзи муҳити зист амалӣ шудааст, муаррифӣ гардид. Иттилоъ дода шуд, ки таҳияи шакли нави барномаҳои Назорат, Экомеп, Маркази тамос, Дидбонгоҳи отмосферӣ ва Рақамикунонии замини Тоҷикистон бо зеҳни сунъӣ, сифати корҳои назоратӣ ва сатҳи хизматрасониро ба мутахассисону шаҳрвандон ба маротиб осон намудааст. Бо барномаи электронии Назорат нозир ва ё масъулини дахлдор имкон пайдо мекунанд, ки ҳангоми ошкор шудани қонуншиканиҳои экологӣ, маҳалли воқеъшавии ҳодисаро тавассути геолокатсия муайян намуда, маълумоти лозимаро дар шакли электронӣ сабт ва протоколи электронӣ таҳия намояд. Барномаи Экомеп бошад, чун пойгоҳи ягонаи маълумоти экологӣ хизмат намуда, маълумоти муҳими соҳаро дар шакли муназзам ва рақамӣ муттаҳид месозад. Ҳоло фаъолияти Маркази тамос бо рақами кӯтоҳи 2122 ба роҳ монда шуда, ки шаҳрвандон метавонанд тавассути он аз ҳолатҳои эҳтимолии вайрон гардидани талаботи қонунгузории ҳифзи муҳити зист хабар дода, муроҷиатҳои худро пешниҳод намоянд. Ин иқдом қадами муҳими самти рақамикунонии фаъолияти Кумитаи ҳифзи муҳити зист буда, барои такмили низоми идоракунии иттилооти экологӣ, баланд бардоштани шаффофият ва рушди хизматрасониҳои рақамӣ дар соҳа заминаи мусоид фароҳам меорад.