Имрӯз, 19-уми март, дар ҷараёни сафари корӣ раиси вилояти Хатлон Давлаталӣ Саид синфҳои иловагии таълимиро барои 200 нафар дар ду баст дар ҷамоати Хуталон, ноҳияи Носири Хусрав, дар муассисаи миёнаи умумии №25 ифтитоҳ намуд.
Гуфта мешавад, ки бо сабаби афзоиши шумораи хонандагон дар муассисаи миёнаи умумии №25 зарурати сохтмони синфҳои иловагӣ пайдо шудааст.
Маҳаллиён ва соҳибкорон нақша доранд, ки то соли 2024 чор синфи иловагӣ барои 200 нафар ва толори маҷлис барои 80 нафар бино кунанд. Ҷамъи маблағҳои ҷамъоваришуда барои корҳои сохтмонӣ 650 ҳазор сомониро ташкил медиҳад.
Раиси вилоят Давлаталӣ Саид бо муаллимон ва хонандагон суҳбат намуд ва ба онҳо супориш дод, ки бо таҳсили хуб ва фаъолиятҳои муассир саҳми худро дар ободии кишвар гузоранд. Ҳамчунин, раиси вилоят таъкид намуд, ки дар шароити мураккаб ва нопешгӯй, дар замони паҳншавии терроризм, ифротгароӣ ва дигар омилҳои хатарноки глобалӣ, вазифаи аслии омӯзгорон тарбияи насли наврас дар рӯҳияи ватандӯстӣ ва ифтихори миллӣ мебошад.
Раиси вилоят амалҳои маҳаллиён ва соҳибкоронро мисоли барҷастаи ватандӯстӣ арзёбӣ намуд.
