Бо ташаббуси Агентии инноватсия ва технологияҳои рақамии назди Президенти Ҷумҳурии Тоҷикистон дар Муассисаи давлатии “Театри миллӣ”-и Дастгоҳи иҷроияи Президенти Ҷумҳурии Тоҷикистон Форуми байналмилалии технологии TAJ-TECH 2026 идома дорад. Дар Форум беш аз ҳазор нафар меҳмонону иштирокдорон, аз ҷумла вазирон, аъзои ҳайатҳои расмӣ, намояндагони созмонҳои байналмилалӣ, сармоягузорон ва намояндагони ширкатҳои пешбари технологӣ аз кишварҳои ИДМ, Осиё, Аврупо ва дигар минтақаҳои ҷаҳон ширкат менамоянд.
Имрӯз 30-юми сентябри соли 2026 дар доираи Форум семинари омӯзишӣ дар мавзӯи “Зеҳни сунъӣ барои давлат, иқтисодиёт ва ҷомеа” баргузор гардид. Дар он мавзуҳои гузариш аз стратегияҳо ва лоиҳаҳои озмоишӣ (пилотӣ) дар соҳаи зеҳни сунъӣ (AI) ба татбиқи васеъмиқёси амалӣ; зарурати ташаккули экосистемаи устувори зеҳни сунъӣ дар иқтидорҳои ҳисоббарорӣ, маълумот, захираҳои кадрӣ ва низоми идоракунӣ; ба даст овардани манфиатҳои иқтисодӣ ва иҷтимоӣ ва ҳамзамон истифодаи бехатар ва боэътимод аз зеҳни сунъӣ таҳлил ва муҳокима гаштанд.
Дар нишаст коршиносони байналмилалӣ, аз ҷумла Норов Владимир Имомович, Масрур Назарӣ, Муҳаммад Алӣ Сиёдатӣ, Шоҳрух Рустамов ва дигарон иштирок ва суханронӣ намуданд. Зимни баромад эшон донишу таҷрибаи худро дар самтҳои рушди ҳукумати рақамӣ, зеҳни сунъӣ, технологияҳои молиявӣ, амнияти киберӣ ва инноватсия муаррифӣ намуданд.
Аз ҷумла, намояндаи Институти байналмилалии Осиёи Марказӣ Норов Владимир Имомович дар баромади худ аз сиёсати хирадмандонаи Асосгузори сулҳу ваҳдати миллӣ, Пешвои миллат, муҳтарам Эмомалӣ Раҳмон ва ташаббуси Ҷумҳурии Тоҷикистон 31 августи соли 2026 Маҷмаи Умумии Созмони Милали Муттаҳид бо ташаббуси қатъномаеро қабул намуд, ки тибқи он аз соли 2027 ҳамасола 31 август ҳамчун Рӯзи байналмилалии зеҳни сунъӣ таҷлил мегардад. Эълон гардидани Рӯзи байналмилалии зеҳни сунъӣ на танҳо барои Тоҷикистон, балки барои таҳкими ҳамкории кишварҳо, табодули таҷриба, рушди технологияҳои нав ва истифодаи зеҳни сунъӣ ба манфиати ҷомеа дар кишварҳои бахусус Осиёи Марказӣ заминаи муҳим фароҳам меорад.
Таъкид гашт, ки ҷаҳон тадриҷан аз энергетикаи анъанавӣ ба манбаъҳои нав, махсусан энергияи офтобӣ, бодӣ ва дигар манбаъҳои барқароршаванда, мегузарад. Агар дируз масъалаи асосӣ пайдо кардани иқтидори истеҳсоли энергия буд, имрӯз масъалаи асосӣ идоракунии оқилонаи барқ аст, ки барои идора кардани зеҳни сунъӣ маълумоти рақамӣ ва технологияҳои интеллектуалӣ аҳамияти калон пайдо мекунанд.
