16-17 сентябри соли 2026 Кумитаи ҳолатҳои фавқулодда ва мудофиаи граждании Назди Ҳукумати Ҷумҳурии Тоҷикистон бо дастгирии Маркази Осиёӣ ва Уқёнуси Ором оид ба рушди идоракунии иттилооти офатҳо ва Идораи СММ оид ба коҳиши хавфи офатҳо семинар-машварати бисёрҷониба дар мавзуи «Таҳияи Чаҳорчӯбаи миллӣ оид ба идоракунии фарогири маълумот дар бораи хавфи офатҳо дар Тоҷикистон» ташкил намуд. Дар чорабинӣ намояндагони мақомоти давлатӣ, шарикони рушд ва созмонҳои байналмилалӣ иштирок карданд. Ҳадафи асосии чорабинӣ таҳкими ҳамкорӣ ва иқтидорҳои миллӣ дар самти идоракунии маълумот оид ба хавфи офатҳо буд.
Аз сабаби хусусиятҳои ҷуғрофӣ ва релефи кӯҳӣ, Тоҷикистон ба офатҳои гуногуни табиӣ ва иқлимӣ, аз қабили заминларза, селу обхезӣ, тарма, ярч ва хушксолӣ бештар осебпазир мебошад. Дар чунин шароит мавҷудияти маълумоти боэътимод, дастрас, ҳамоҳангшуда ва фарогир барои арзёбии хавфҳо, қабули қарорҳо, банақшагирии чораҳои коҳиши хавф ва таҳкими низомҳои огоҳии бармаҳал аҳамияти муҳим дорад.
Дар доираи чорабинӣ масъалаҳои марбут ба низоми идоракунӣ, ҳамоҳангсозии институтсионалӣ, мубодила ва ҳамгироии маълумот, мутобиқати низомҳои иттилоотӣ ва таъмини фарогирӣ ва дастрасии маълумот баррасӣ шуданд. Ҳамчунин таҷриба ва натиҷаҳои ташаббусҳои марбут ба маълумоти талафот ва зарари офатҳои табиӣ, аз қабили системаи DELTA Resilience, дониши хавф ва низомҳои огоҳсозии бармаҳал муҳокима гардиданд.
Муколамаи бисёрҷониба ба иштирокчиён имкон дод, ки нақш ва масъулияти ҷонибҳои гуногун, ҷараёнҳои мубодилаи маълумот ва имкониятҳои таҳкими ҳамкории байниидоравиро муҳокима ва муайян намоянд.
Яке аз самтҳои асосии семинар-машварат муҳокимаи лоиҳаи ибтидоии Чаҳорчӯбаи миллӣ оид ба идоракунии фарогири маълумот дар бораи хавфи офатҳо дар Ҷумҳурии Тоҷикистон буд. Иштирокчиён масъалаҳои асосӣ, норасоиҳои техникӣ ва институтсионалӣ, инчунин афзалиятҳо ва қадамҳои минбаъдаро барои рушди низоми ҳамгиро ва фарогири идоракунии маълумот муайян карданд.
Натиҷаҳои семинар барои такмили Чаҳорчӯбаи миллӣ ва Харитаи роҳ, таҳкими ҳамоҳангсозӣ ва мубодилаи маълумот байни муассисаҳо ва муайян намудани самтҳои минбаъдаи ҳамкорӣ дар соҳаи идоракунии хавфи офатҳо замина фароҳам оварданд.
