Санаи 11 августи соли равон аз ҷониби Агентии хизмати давлатии назди Президенти Ҷумҳурии Тоҷикистон дар ҳамкорӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба ифтихори 35-солагии Истиқлолияти давлатии Ҷумҳурии Тоҷикистон ҳамоиши ҷавонони соҳаи хизмати давлатӣ таҳти унвони «Таҳкими қобилиятнокии ҷавонон дар хизмати давлатӣ» баргузор гардид.
Дар ҳамоиши мазкур Идрисзода И.М.-директори Агентии хизмати давлатии назди Президенти Ҷумҳурии Тоҷикистон, Раҳимзода Шабнам Карим-муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон муовинони директори Агентӣ, кормандони дастгоҳи марказии Агентӣ, хизматчиёни давлатии ҷавони вазорату идораҳо, магистратони «Мактаби давлатдории Эмомалӣ Раҳмон»-и Академияи идоракунии давлатии назди Президенти Ҷумҳурии Тоҷикистон, инчунин аъзоёни ташкилоти ҷамъиятии «Иттифоқи ҷавонони Тоҷикистон» дар назди Кумитаи кор бо ҷавонон ва варзиши назди Ҳукумати Ҷумҳурии Тоҷикистон иштирок намуданд.
Дар ифтитоҳи чорабинӣ директори Агентӣ зимни суханронӣ иброз намуданд, ки Ҳукумати кишвар таҳти роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар сиёсати иҷтимоии кишвар соҳаи ҷавононро мавриди таваҷҷӯҳи махсус қарор дода, барои рушди он пайваста тадбирҳои муассирро амалӣ менамоянд. Қабули стратегияву барномаҳои соҳавӣ, таъсиси квотаҳои Президентӣ, ҷоизаҳо, эълон гардидани «Соли ҷавонон», таъсиси Шӯрои миллии кор бо ҷавонон дар назди Президенти Ҷумҳурии Тоҷикистон ва дигар иқдомҳои муассир ҳамагӣ барои таҳкими иштироки фаъоли ҷавонон дар кулли соҳаҳои ҳаёти ҷомеа, аз ҷумла идораи давлатӣ ва хизмати давлатӣ равона гардидаанд.
Дар идомаи чорабинӣ маърузачиён баён доштанд, ки дастгирии ҷавонон ва таъмини онҳо бо ҷойҳои нави корӣ, дар асоси истифодаи технологияҳои иттилоотиву коммуникатсионӣ ва донистани забонҳои хориҷӣ диққати махсус дода, пешниҳодҳои ҷавононро баҳри инкишофи ватани азизамон доимо дастгирӣ менамоянд ва бунёди шароити мусоиди кору фаъолиятро барои ҷавонон пайваста таъмин месозанд.
Дар фарҷоми ҳамоиш, барои фаъолияти самарабахш ва саҳми арзанда дар низоми хизмати давлатӣ, як қатор хизматчиёни давлатии ҷавони мақомоти давлатӣ бо мукофотҳои идоравии Агентӣ ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон қадршиносӣ гардиданд.
