Санаи 4 июли соли 2026 дар Боғи фарҳангию фароғатии «Садриддин Айнӣ»-и шаҳри Душанбе рӯзҳои фарҳангии ноҳияи Ашт бо шукуҳу шаҳомати хоса баргузор гардида, маҳсулоти кишоварзию саноатӣ, ҳунарҳои мардумӣ, таомҳои миллӣ ва барномаи рангини фарҳангиву…
Санаи 4 июли соли 2026 дар Боғи фарҳангию фароғатии «Садриддин Айнӣ»-и шаҳри Душанбе рӯзҳои фарҳангии ноҳияи Ашт бо шукуҳу шаҳомати хоса баргузор гардида, маҳсулоти кишоварзию саноатӣ, ҳунарҳои мардумӣ, таомҳои миллӣ ва барномаи рангини фарҳангиву адабӣ пешкаши сокинону меҳмонони пойтахт гардонида шуд.
Дар чорабинии мазкур муовини Раиси шаҳри Душанбе - Раҳимзода Толиб Карим, муовини Раиси ноҳияи Исмоили Сомонӣ - Раҳимзода Нурулло Сайфулло, Раиси ноҳияи Ашт - Муҳаммадзода Шӯҳрат ва дигар меҳмонону масъулин иштирок намуданд.
Зимни боздид меҳмонон аз намоиши маҳсулоти кишоварзиву саноатӣ, маҳсули дасти ҳунармандони мардумӣ, таомҳои миллӣ ва дастовардҳои иҷтимоиву иқтисодии ноҳияи Ашт шинос гардида, ба сатҳу сифати маҳсулоти пешниҳодшуда баҳои баланд доданд.
Ҳамзамон, аҳли фарҳанг ва ҳунармандони ноҳияи Ашт бо пешниҳоди барномаи рангини фарҳангиву консертӣ, суруду таронаҳои ватандӯстона ва рақсу оҳангҳои миллӣ табъи иштирокчиёнро болида гардонида, фарҳангу суннатҳои неки миллати тоҷикро муаррифӣ намуданд.
Дар доираи чорабинӣ муовини Раиси ноҳияи Исмоили Сомонӣ - Раҳимзода Нурулло Сайфулло ба Раиси ноҳияи Ашт - Муҳаммадзода Шӯҳрат барои ҳамкориҳои мутақобилан судманд ва муаррифии дастовардҳои ноҳияи Ашт дар пойтахти кишвар Сипосномаи Мақомоти иҷроияи ҳокимияти давлатии ноҳияи Исмоили Сомониро тақдим намуд.
Бояд зикр кард, ки баргузории рӯзҳои фарҳангии шаҳру ноҳияҳои ҷумҳурӣ дар шаҳри Душанбе ба таҳкими дӯстиву ҳамдигарфаҳмӣ, рушди муносибатҳои фарҳангӣ, муаррифии дастовардҳои даврони соҳибистиқлолӣ ва эҳёи анъанаҳои миллӣ мусоидат намуда, дар доираи омодагиҳо ба таҷлили 35-солагии Истиқлоли давлатии Ҷумҳурии Тоҷикистон аҳамияти муҳим дорад.
