Дар доираи сафари корӣ 21–23 сентябри соли 2026 гурӯҳи кории Кумитаи бехатарии озуқавории назди Ҳукумати Ҷумҳурии Тоҷикистон таҳти роҳбарии муовини Раиси Кумита Абдурозиқзода Лутфулло Давлат аз марказҳои бехатарии озуқавории Кумита дар шаҳру ноҳияҳои тобеи ҷумҳурӣ водии Рашт боздид ба амал оварда, бо роҳбарият ва кормандони марказҳо мулоқот ва суҳбатҳо анҷом дод.
Зимни сафар, пеш аз ҳама, масъалаи иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти гузариш ба иқтисоди рақамӣ ва истифодаи самараноки технологияҳои иттилоотию коммуникатсионӣ дар доираи «Солҳои рушди иқтисоди рақамӣ ва инноватсия (2025–2030)» баррасӣ гардид.
Ҳамзамон, ҷиҳати татбиқи ҳадафи стратегии мамлакат — таъмини амнияти озуқаворӣ, раванди рақамикунонии фаъолияти мақомоти бехатарии озуқаворӣ, аз ҷумла:
таҳлили равандҳои хизматрасонии давлатӣ ва муайян намудани хизматрасониҳои дорои имконияти рақамикунонӣ;
рақамикунонии самтҳои фаъолияти мақомоти бехатарии озуқаворӣ;
гузариш ба гардиши ҳуҷҷатҳои электронӣ тавассути низоми edo.innovation.tj;
ҷорӣ намудани технологияҳои муосири рақамӣ дар фаъолияти Кумита ва сохторҳои он;
баланд бардоштани сатҳи истифодаи хизматрасониҳои электронӣ ва саводнокии рақамии кормандон мавриди баррасӣ қарор гирифт.
Дар фарҷоми сафар ба роҳбарият ва кормандони марказҳои бехатарии озуқаворӣ ҷиҳати фаъол намудани хизматрасониҳои электронӣ, такмили равандҳои корӣ ва баланд бардоштани саводнокии рақамӣ тавсияҳои мушаххас дода шуданд.
Рақамикунонӣ — заминаи муҳими баланд бардоштани самаранокӣ, шаффофият ва сифати хизматрасониҳои давлатӣ дар соҳаи бехатарии озуқаворӣ мебошад.
Бахши робита бо ҷомеаи Кумитаи бехатарии озуқавории назди Ҳукумати Ҷумҳурии Тоҷикистон
