Дар шаҳри Душанбе Конфронси илмӣ-амалӣ таҳти унвони "Баробарии гендерӣ ва гуногунии биологӣ: Роҳ ба сӯи тағйироти системавӣ" баҳри пешбурди рӯзномаи экологии Тоҷикистон баргузор гардид, ки дар кори он намояндагони мақомоти давлатӣ, созмонҳои байналмилалӣ, ҷомеаи илмӣ, ҷомеаи шаҳрвандӣ, бахши хусусӣ ва ҷомеаҳои маҳаллӣ иштирок ва суханронӣ намуда, доир ба масъалаи нақши занон дар ҳифзи гуногунии биологӣ ва идоракунии устувори захираҳои табиӣ андешаронӣ намуданд.
Зимни баргузории конфронс гуфта шуд, ки таҷрибаҳо ва ташаббусҳои муваффақ нишон медиҳанд, ки саҳми занон дар ҳифзи муҳити зист, устувории кишоварзӣ, соҳибкории экологӣ ва таҳқиқоти илмӣ хеле назаррас мебошад. Қайд гардид, ки имрӯзҳо бо шарофати Истиқлолияти давлатӣ таваҷҷуҳи махсус ба афзоиши иштироки занон зимни қабули қарорҳо вобаста ба масъалаҳои ҳифзи муҳити зист ва рушди ҳамкории байнисоҳавӣ густариш ёфта, корҳои илмӣ-таҳкиқотӣ ба роҳ монда шудааст.
Бахши дигари конфронс ин муаррифии "Харитаи роҳи миллӣ барои васеъ кардани иштироки занон дар ҳифзи гуногунии биологӣ ва оғози платформаи рақамии миллӣ оид ба гендер ва гуногунии биологӣ" буда, барои тақвияти шарикӣ ва пешбурди роҳҳои ҳалли фарогири гендерӣ дар равандҳои ҳифзи гуногунии биологӣ ҷиҳати мусоидат ба рушди устувор, инчунин пешбурди рӯзномаи экологии Тоҷикистон равона гардида буд.
