Дар доираи Нақшаи чорабиниҳои Кумитаи кор бо занон ва оилаи назди Ҳукумати Ҷумҳурии Тоҷикистон дар Қасри фарҳанги ноҳияи Муъминобод вохӯрии Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафшаи Файзиддинзода бо фаъолону…
Дар доираи Нақшаи чорабиниҳои Кумитаи кор бо занон ва оилаи назди Ҳукумати Ҷумҳурии Тоҷикистон дар Қасри фарҳанги ноҳияи Муъминобод вохӯрии Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафшаи Файзиддинзода бо фаъолону сокинони ноҳия баргузор шуд.
Дар вохӯрӣ фаъолзанон, раисони шӯроҳои занони ташкилоту муассисаҳо, деҳаҳо ва маҳаллаҳо, имомхатибон, роҳбарони соҳаҳои маорифу тандурустӣ, мудирони бахшҳои кор бо ҷавонон ва варзиш, дин, танзими анъана ва ҷашну маросим, занон ва кор бо оила, фарҳанг, инчунин масъулини ҷамоатҳои шаҳрак ва деҳот иштирок намуданд.
Зимни суханронӣ Раиси Кумита ба масъалаҳои муҳими сиёсати давлатӣ дар самти ҳифзи ҳуқуқу манфиатҳои занону оила таваҷҷуҳи иштирокдоронро ҷалб намуда, муҳтавои Қонуни Ҷумҳурии Тоҷикистон «Дар бораи пешгирии зӯроварӣ дар оила», Барномаи давлатии рушди оила дар Ҷумҳурии Тоҷикистон барои солҳои 2024–2028, Барномаи давлатии пешгирии зӯроварӣ дар оила барои солҳои 2025–2030, Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занон ва духтарони болаёқат барои солҳои 2023–2030, инчунин Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021–2030-ро шарҳу тавзеҳ доданд.
Ҳамзамон, оид ба дастгирии пайвастаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба занону модарон, соҳибкорзанон, оилаҳои ҳунарманд ва фароҳам овардани имкониятҳои мусоид барои рушди соҳибкорӣ ва ҳунарҳои мардумӣ, аз ҷумла ҷудо гардидани грантҳои президентӣ баҳри таъсиси ҷойҳои нави корӣ ва рушди ҳунарҳои миллӣ, ибрози назар карда шуд.
Дар идомаи вохӯрӣ масъалаҳои ҳифзи арзишҳои миллӣ, пешгирии бегонапарастӣ, тарбияи насли наврас дар рӯҳияи ватандӯстиву худшиносии миллӣ, ҳифзи дастовардҳои даврони Истиқлоли давлатӣ, инчунин омодагии ҳамаҷониба ба таҷлили ҷашни 35-солагии Истиқлоли давлатии Ҷумҳурии Тоҷикистон мавриди баррасӣ қарор гирифтанд. Таъкид гардид, ки ҳар як шаҳрванди кишвар бояд бо ҳисси баланди ифтихор аз истиқлолу озодӣ ва шукргузорӣ аз сулҳу ваҳдати миллӣ дар ободии Ватани азиз саҳми арзандаи худро гузорад.
