БА ВОСИТАҲОИ АХБОРИ ОММА
маълумот оид ба натиҷаи фаъолияти Кумитаи давлатии
идораи замин ва геодезии Ҷумҳурии Тоҷикистон дар соли 2025
Дар соли 2025 Кумитаи давлатии идораи замин ва геодезӣ пеш аз ҳама баҳри иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, қарорҳои Ҳукумати мамлакат ва Дастгоҳи иҷроияи Президенти Ҷумҳурии Тоҷикистон як қатор корҳоро ба сомон расонд.
Дар давраи ҳисоботӣ лоиҳаи қарори Ҳукумати Ҷумҳурии Тоҷикистон “Дар бораи ҳисобот оид ба заминҳои мавҷудбуда, тақсимоти онҳо аз рўи гурўҳҳо, намудҳо ва заминистифодабарандагони ҷумҳурӣ ба ҳолати 1 январи соли 2025” таҳия ва бо қарори дахлдори Ҳукумати мамлакат аз 28 марти соли 2025, №224 тасдиқ гардида, корбарӣ тибқи он идома ёфтанд.
Дар самти назорати истифодаи замин бошад соли 2025 ҳамагӣ 13420 ҳолати вайронкунии қонунгузории замин ошкор гардида, барои бартараф намудани ҳолатҳои ошкоршудаи қонунвайронкунӣ 12218 дастур дода шуда, нисбати 11677 ҳолат парвандаҳои маъмурӣ тартиб дода шудаааст.
Аз 7001311 сомонӣ маблағи ҷаримабандӣ шуда, 5892557 сомонӣ ба суратҳисоби махсус ворид гардидааст.
Ҳамчунин, барои додани баҳои ҳуқуқӣ 1035 мавод ба прокуратура ва 927 адад ба Иҷрочиёни хадамоти иҷро ирсол ва 10066 ҳолати вайронкунии қонунгузории замин бартараф карда шудааст.
Дар давраи ҳисоботӣ нозирони дастгоҳи марказии Кумитаи давлатӣ 107 ҳолат, кумитаҳои идораи замини вилояти Хатлон 5670 ҳолат, Суғд 4807 ҳолат, ВМКБ 451 ҳолат ва кумитаҳои идораи замини шаҳру ноҳияҳои тобеи ҷумҳурӣ 2385 ҳолати вайронкунии қонунгузории заминро ошкор намудаанд.
Дар натиҷаи андешидани чораҳои мушаххас аз ҷониби нозирони кумитаи идораи замини вилоятҳои Хатлон 4910 ҳолат, Суғд 3267 ҳолат, ВМКБ 385 ҳолат ва аз тарафи кумитаҳои идораи замини шаҳру ноҳияҳои тобеъи ҷумҳурӣ 1504 ҳолати вайронкунии қонунгузории замин дар маҳал бартараф карда шудааст.
Кумитаи давлатӣ вобаста ба иҷрои талаботи Фармони Президенти Ҷумҳурии Тоҷикистон аз 30 июни соли 2006, №1775 «Дар бораи тадбирҳои иловагӣ оид ба азнавташкилдиҳӣ ва ислоҳоти ташкилотҳои кишоварзӣ» ва Қонуни Ҷумҳурии Тоҷикистон “Дар бораи хоҷагии деҳқонӣ (фермерӣ)” корҳои муайянро ба сомон расонид.
Ба ҳолати 24 декабри соли 2025 шумораи умумии хоҷагиҳои деҳқонӣ дар миқёси ҷумҳурӣ 200349 ададро ташкил дода, аз ин шумора 71572 адад дар вилояти Суғд, 75653 адад дар вилояти Хатлон, 16723 адад дар ВМБК ва 36401 адад дар ноҳияҳои тобеи ҷумҳурӣ ба қайди давлатӣ гирифта шудаанд.
Соли 2025 шумораи хоҷагиҳои деҳқонии навташкилшуда 2560 ададро ташкил дода, аз ин: 749 адад дар вилояти Суғд, 1131 адад дар вилояти Хатлон, 87 адад дар ВМБК ва 593 адад дар шаҳру ноҳияҳои тобеӣ ҷумҳурӣ ба қайди давлатӣ гирифта шудаанд.
Инчунин, шумораи умумии саҳмдорони хоҷагиҳои деҳқонӣ ба ҳолати 24 декабри соли 2025 дар миқёси ҷумҳурӣ 796094 нафар, дар вилояти Суғд 296448 нафар, дар вилояти Хатлон 373379 нафар, 23719 нафар дар ВМБК ва 102548 нафар дар ноҳияҳои тобеӣ ҷумҳурӣ ба қайд гирифта шуд.
Вобаста ба такмили қонунгузории соҳа қайд намудан ба маврид аст, ки дар Кумитаи давлатӣ гурўҳи корӣ «Оид ба мукаммал сохтани қонунгузории соҳаи замин» фаъолият менамояд, ки доимо аз рўйи ҷадвали баргузории вохўрии гурўҳи корӣ вобаста ба такмил додани санадҳои меъёрии ҳуқуқии соҳавӣ ва дар таҳрири нав таҳия намудани онҳо, ки барои пешрафти соҳа, аз байн бурдани мухолифатҳои меъёрҳои қонунгузории соҳа, ба танзим даровардани муносибатҳои вобаста ба замин ва коҳиш додани кирдорҳои хусусияти коррупсионидошта мусоидат менамояд, корҳо ба анҷом расонида мешаванд. Ин аст, ки дар соли сипаришуда Кумитаи давлатӣ ҳамчун мақоми ваколатдори давлатӣ дар самти танзими муносибатҳо вобаста ба замин ва субъекти ҳуқуқэҷодкунандаи соҳа дар соли 2025 як қатор лоиҳаҳои санадҳои меъёрии ҳуқуқиро таҳия ва барои тасдиқ пешниҳод намуд. Аз ҷумла, дар ин давра, лоиҳаи Кодекси замини Ҷумҳурии Тоҷикистон дар таҳрири нав, лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи хоҷагии деҳқонӣ (фермерӣ)» таҳия гардидаанд.
Соли 2025 барои ишғоли мансабҳои холии маъмурии хизмати давлатӣ 4 маротиба озмун, аз ҷумла бори аввал барои ишғоли 38 мансаби холӣ, бори дуюм 43 ва бори сеюм ва чорум 39 мансаби холии маъмурии хизмати давлатии Кумитаи давлатӣ гузаронида шуда, дар натиҷа бори аввал 38 нафар, бори дуюм 43 нафар ва бори сеюм ва чорум 39 ба мансабҳои холии маъмурии хизмати давлатӣ таъин гардиданд, ки аз онҳо 16 нафар кадрҳои ҷавон ва 3 нафар зан мебошанд.
Моҳҳои апрел ва декабри соли 2025 ду маротиба аттестатсияи навбатии хизматчиёни давлатӣ гузаронида шуда, ҳамагӣ 119 нафар ба аттестатсия фаро гирифта шуданд, ки аз онҳо 107 нафар ба мансаби ишғолнамуда мувофиқ дониста шуда, 9 нафар ба аттестатсияи такрорӣ мононда шуданд ва 3 нафари дигар аз мансабҳои ишғолнамудаашон озод шуданд.
Дар самти робитаҳои байналмиллалӣ низ корҳои муайян иҷро шуда, дар доираи сафари давлатии Президенти Ҷумҳурии Қирғизистон ба Ҷумҳурии Тоҷикистон санаи 89 июли соли 2025 Созишнома байни Ҳукумати Ҷумҳурии Тоҷикистон ва Девони Ҷумҳурии Қирғизистон “Оид ба ҳамкорӣ дар соҳаи геодезия, харитасозӣ, заминсозӣ, кадастр, бақайдгирии молу мулки ғайриманқул ва мушоҳидаи фосилавии замин”, ҳамчунин дар доираи сафари давлатии Президенти Федератсияи Россия ба Ҷумҳурии Тоҷикистон санаи 9 октябри соли 2025 Созишнома байни Кумитаи давлатии идораи замин ва геодезии Ҷумҳурии Тоҷикистон ва Хадамоти федералии бақайдгирии давлатӣ, кадастр ва харитасозии Федератсияи Россия оид ба ҳамкорӣ бо ҳадафи рушд ва ғанӣ гардонидани Геопортали инфрасохтори маълумоти фазоии давлатҳои иштирокдори Иттиҳоди Давлатҳои Мустақил ба имзо расида, корбарӣ дар ин самт идома доранд.
Дар давраи ҳисоботӣ аз ҷониби корхонаву муассисаҳои системаи Кумитаи давлатӣ ҳамагӣ ба маблағи 19331833 сомонӣ корҳои заминсозӣ, топографӣгеодезӣ ва харитасозӣ аз ҳисоби буҷет иҷро гардидааст, ки нисбат ба ҳамин давраи соли 2024 маблағи 2919647 сомонӣ зиёд буда, 117,8%ро ташкил дод.
Қайд намудан ба маврид аст, ки корхонаву муассисаҳои системаи Кумитаи давлатӣ дар ин давра корҳои буҷетиро якҷоя бо корҳои шартномавӣ ҳамагӣ ба маблағи 194 млн.2 51 ҳазору 408 сомонӣ иҷро намудаанд, ки нисбат ба соли 2024 ба маблағи 17 млн. 396 ҳазору 667 сомонӣ зиёд буда, нисбат ба соли 2024 иҷрои он 109,8%ро ташкил дод.
Дар давраи ҳисоботӣ аз ҷониби корхонаҳои минтақавии бақайдгирӣ 37398 адад ҳуқуқи истифодаи қитъаҳои замин, аз он 2560 адад хоҷагиҳои деҳқонӣ, 82 адад хоҷагиҳои иловагии ёрирасони шахсӣ, 26885 адад қитъаҳои замини наздиҳавлигӣ, 504 адад дигар намудҳои хоҷагидорӣ, 7367 адад дигар намуди қитъаҳои замин ба қайди давлатӣ гирифта шуда, заминистифодабарандагон бо Шаҳодатнома дар бораи бақайдгирии давлатӣ таъмин гардидаанд.
Дар давраи ҳисоботӣ КДФ «Бақайдгирии молу мулки ғайриманқул» дар шаҳру ноҳияҳои ҷумҳурӣ ҳамагӣ 47081 адад парвандаҳои заминсозиро таҳия намудаанд.
Соли 2025ум 113 адад парвандаи заминсозӣ оид ба додани қитъаҳои замин, ки бо супориши Ҳукумати Ҷумҳурии Тоҷикистон сурат мегиранд, аз кумитаҳои идораи замини шаҳру ноҳияҳо барои гузаронидани экспертизаи ҳуҷҷатҳо ва мувофиқакунӣ бо вазорату идораҳои дахлдор ба Кумитаи давлатӣ ворид гардид.
Аз онҳо баъд аз ташхиси техникӣ бинобар сабаби ҷой доштани камбудиҳо 33 адад парвандаи заминсозӣ бозпас гардонида шуда, 43 адад парванда дар мувофиқакунонӣ бо вазорату идораҳои дахлдори ҷумҳурӣ қарор дошта, 9 адад лоиҳаҳои қарори Ҳукумати Ҷумҳурии Тоҷикистон дар мувофиқаи роҳбарони вазорату идораҳо қарор дошта, 20 адад парванда барои баррасӣ ба Ҳукумати Ҷумҳурии Тоҷикистон пешниҳод гардид.
Дар давраи ҳисоботӣ 46 адад қарори Ҳукумати Ҷумҳурии Тоҷикистон аз ҷумла 38 адад аз рўи парвандаҳои солҳои пешин ирсолшуда ва 8 адад аз рўи парвандаҳои соли 2025 ирсолшуда ба имзо расиданд.
Дар самти барўйхатгирии техникӣ ташкилотҳои минтақавии бақайдгирии шаҳру ноҳияҳои ҷумҳурӣ ба миқдори 84775 адад иҷро намудаанд, ки аз он 33724 адад барўйхатгирии техникии асосӣ, 31926 адад барўйхатгирии техникии ҷорӣ ва 19125 адад дигар намуди корҳоро ташкил медиҳад.
Кумитаи давлатии идораи замин ва геодезӣ барои ислоҳи камбудиҳои ҷойдошта чораҳои зарурӣ андешида, минбаъд низ ҷиҳати назорати истифодаи мақсадноки қитъаҳои замин, пешгирии қонунвайронкуниҳо, иҷрои ҳатмии дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, махсусан вазифагузориҳояшон, ки дар Паёми навбатии Президенти мамлакат баён шудаанд, корбариро боз ҳам ҷоннок намуда, барои беҳтар намудани фаъолият аз тамоми имкониятҳо истифода хоҳад бурд.
