ИСТИҚЛОЛИЯТИ ДАВЛАТӢ – ПОЯИ ДАВЛАТДОРИИ МИЛЛӢ ВА КАФИЛИ РУШДИ УСТУВОРИ ТОҶИКИСТОН
https://www.facebook.com/share/p/1B4TRN3tPf/
Дар таърихи ҳар як миллат рӯзҳое ҳастанд, ки тақдири ояндаи давлат ва мардумро муайян месозанд. Барои халқи тоҷик чунин рӯзи сарнавиштсоз 9 сентябри соли 1991 мебошад. Дар ин рӯз Ҷумҳурии Тоҷикистон Истиқлолияти давлатии худро эълон намуда, ба ҳайси давлати соҳибихтиёр ба ҷомеаи ҷаҳонӣ ворид гардид.
Аз ҳамон рӯз марҳилаи нави давлатдорӣ оғоз ёфт ва миллати тоҷик имконият пайдо кард, ки сиёсати дохиливу хориҷии худро мустақилона муайян намуда, барои бунёди давлати демократӣ, ҳуқуқбунёд, дунявӣ ва иҷтимоӣ замина гузорад.
Ҳар як дастоварде, ки имрӯз Тоҷикистон ба он ноил гардидааст, маҳз самараи истиқлолият ва сулҳу суботи кишвар аст. Дар солҳои истиқлолият Тоҷикистон ба натиҷаҳои назаррас ноил гардид. Дар тамоми гӯшаву канори кишвар садҳо иншооти муҳими давлатӣ бунёд шуданд. Роҳҳои байналмилалӣ, нақбҳо, пулҳо, неругоҳҳои барқи обӣ, муассисаҳои таълимӣ, беморхонаҳо, марказҳои фарҳангӣ ва варзишӣ симои кишварро дигаргун карданд.
Дар соҳаи энергетика татбиқи лоиҳаҳои бузург ба таъмини амнияти энергетикии мамлакат мусоидат намуд. Истифодаи иқтидори бузурги захираҳои обӣ барои рушди иқтисоди миллӣ аҳамияти калон дорад.
Дар соҳаи нақлиёт бунёди роҳҳо ва нақбҳои замонавӣ минтақаҳои кишварро бо ҳам пайваст намуда, имкониятҳои нави тиҷорат ва рушди иқтисодиро фароҳам оварданд. Яке аз ҳадафҳои асосии даврони истиқлол таҳкими иқтисоди миллӣ мебошад. Дар ин самт барномаҳои давлатӣ барои рушди саноат, кишоварзӣ, соҳибкорӣ ва ҷалби сармоя амалӣ гардида истодаанд.
Дар солҳои охир корхонаҳои нави истеҳсолӣ таъсис ёфта, ҷойҳои нави корӣ муҳайё шудаанд. Саноатикунонии босуръат яке аз самтҳои муҳими рушди кишвар ба шумор рафта, ба афзоиши истеҳсоли маҳсулоти ватанӣ ва баланд гардидани иқтидори содиротии Тоҷикистон мусоидат мекунад.
Соҳаи кишоварзӣ низ рушд ёфта, истеҳсоли маҳсулоти кишоварзӣ, истифодаи технологияҳои муосир ва баланд бардоштани ҳосилнокӣ барои таъмини амнияти озуқавории кишвар аҳамияти калон доранд. Пешрафти ҳар як давлат аз сатҳи маърифату дониши шаҳрвандонаш вобаста аст. Аз ин рӯ, дар даврони соҳибистиқлолӣ соҳаи маориф яке аз самтҳои афзалиятноки сиёсати давлатӣ эълон гардид.
Дар тамоми кишвар мактабҳои нав, муассисаҳои томактабӣ ва донишгоҳҳо бунёд шуда, шароити таълим сол аз сол беҳтар мегардад. Татбиқи технологияҳои рақамӣ, омӯзиши забонҳои хориҷӣ ва рушди илм барои тарбияи мутахассисони рақобатпазир аҳамияти калон дорад.
Имрӯз ҷавонони тоҷик дар олимпиадаҳои байналмилалӣ ва озмунҳои илмӣ иштирок намуда, бо натиҷаҳои арзанда обрӯи Тоҷикистонро баланд мебардоранд. Ин аз он шаҳодат медиҳад, ки сармоягузорӣ ба соҳаи маориф сармоягузорӣ ба ояндаи давлат мебошад.
Исоева Ганҷина Ботурхоновна
Сармутахассиси раёсати муносибатҳои меҳнатӣ ва сатҳи зиндагии аҳолӣ
