Бо мақсади тарғиби фарҳанги миллӣ, баланд бардоштани ҳисси худшиносиву худогоҳии миллӣ ва пешгирии зуҳуроти бегонапарастӣ, аз ҷумла истифодаи либосҳои ба фарҳанги миллии тоҷикон бегона, дар бозори марказии ноҳияи Мир Сайид Алии Ҳамадонӣ чорабинии фаҳмондадиҳӣ баргузор гардид.
Дар реди муштарак Сармуҳаррири рӯзномаи ноҳиявӣ, мудири бахши кор бо занон ва оила, мудири бахши сабти асноди ҳолати шаҳрвандӣ (САҲШ), мудири бахши дин, танзими анъана ва ҷашну маросим ва сармутахассиси бахши кор бо ҷавонон ва варзиши ноҳия иштирок намуданд.
Зимни баргузории ред бо соҳибкорон, фурӯшандагон ва сокинон суҳбату мулоқотҳои инфиродӣ доир гардида, вобаста ба эҳтиром гузоштан ба фарҳангу анъанаҳои миллӣ, риояи фарҳанги либоспӯшӣ ва ҳифзи арзишҳои миллӣ корҳои тарғиботиву фаҳмондадиҳӣ анҷом дода шуданд.
Иштирокчиёни чорабинӣ иброз доштанд, ки арҷгузорӣ ба фарҳанги миллӣ ва мероси ниёгон яке аз омилҳои муҳими таҳкими худшиносии миллӣ, ваҳдати ҷомеа ва рушди давлатдорӣ ба шумор меравад.
Ҳамзамон, ба шаҳрвандон тавсия дода шуд, ки дар баробари истифодаи либосҳои миллӣ ва риояи меъёрҳои фарҳангии ҷомеа, дар тарбияи насли ҷавон низ ба масъалаҳои худшиносӣ ва ифтихори миллӣ таваҷҷуҳи бештар зоҳир намоянд.
Чунин чорабиниҳои фаҳмондадиҳӣ минбаъд низ дар ҳудуди ноҳия ба роҳ монда шуда, ҷиҳати баланд бардоштани маърифати шаҳрвандон ва ҳифзи арзишҳои миллӣ мусоидат хоҳанд кард.
Ҷовид Қувватзода
